Plantun de Prouvènço

Pèr coumpara dos planto d'encò nostre

Fragaria viridis & Potamogeton cripus

Majoufié

Fragaria viridis

Rosaceae

Àutri noum : Fraguié, Ambrouso.

Nom en français : Fraisier vert.

Descripcioun :
Aquéu majoufié (o fraguié) douno d'èr au fraguié coumun, que s'arregardas pas de proche pòu engana eisa. Trachis dins li bos fres de colo e de basso mountagno majamen dins li blachiero. Sèmblo adounc à Fragaria vesca, pamens èi mai grand e fort dins touto si partido ; li flour soun pu grando (souvènt > 20 mm). Se destrìo peréu emé si fueio mai pelouso e subretout si fueioun dóu "calice" que soun revessa sus lou fru (escarta encò dóu fraguié coumun).

Usanço :
Lou fru èi de segur manjadis, mai pas tant bon qu'aquéu dóu fraguié, Fragaria vesca (mèfi pamens de l'equinocoucoso). Li flour e li fueio soun tambèn bono à manja. Se fai de tè emé li fueio. Touto la planto fai pissa e èi tounico e depurativo. Li racino soun bono contro la cagagno (astringènto).

Port : Erbo
Taio : 8 à 50 cm
Fueio : coumpausado
Tipe bioulougico : Emicriptoufite
Cicle bioulougico : Planto renadivo

Gènre : Fragaria
Famiho : Rosaceae

Ordre : Rosales

Coulour de la flour : Blanco
Petalo : 5
Ø (o loungour) flour : 14 à 25 mm
Flourido : Printèms

Sòu : Ca
Autour basso e auto : Pancaro entresigna
Aparado : Noun
Mai à jun

Liò : Blachiero
Estànci : Subremediterran à Mountagnard
Couroulougi : Éurasiatico-Centre-Ouèst
Ref. sc. : Fragaria viridis Weston, 1771

Espigo-d'aigo(-crespado)

Potamogeton cripus

Potamogetonaceae

Autre noum : Poutamot.

Nom en français : Potamot à feuilles crépues.

Descripcioun :
Aquesto espigo-d'aigo fai d'embuscun que resto entre dos aigo. Se recounèis eisa à si fueio verdo founso un pau coulour de brounze e di bord crespa. Lis espigo fan de 0,5 à 2 cm. Èi coumuno soulamen dins li plano de coustiero.

Usanço :
D'ùnis espigo-d'aigo sarien manjadisso en Asìo.